Namni kamuu du'a hin oolu; du’a balfus, duuni isa hin balfu. Garuu namni akka du'u utuma beeku, akka isa hin duunetti deddeebi'a. “Akka nama barabaraan jiraatuutti dhama'i, akka nama amma du'uutti hojii gaarii of harkaa qabaadhu!” kan jedhamu namoota hedduu biraa bakka hamma xurii qeensaa iyyuu hin qabu. Kana qofaa miti, firaa fi hiriyyaan har'a akka lubbuu keenyaatti jaalannu hunduu guyyaa ijji isaa walitti deebi'u, hafuurri isaa foon irraa adda bahu namni beeku hin jiru. Akka tasaa osoo namoota kanneen keessaa tokko miidhama lubbuu miidhamee, baay'een keenya hamma eegamuun ol miidhamna. Kunis jiraatti yeroo waliif qabaachuu dhabuu keenya irraa waan maddudha. Waliif gadduun, oo'a waliif agarsisuun, namatti dhagayamuun akkuma jirutti ta'ee, miidhama jireenyaa fi sammuu harka caalmaan kan dhaqqabsiisu, jiraatti quba waldhabuu, waan godhanii fi walii godhan osoo hin raawwatin deddeebi’uu, akka wal jaalatan walitti himuu dhiisuu, bakka waliif qaban qoma rurrukutachaa waliif ibsuu hafuun warreen ijoodha. Kana gochuuf dirqama qabeenya addaa qabaachuun, kennaa gatii jabeessa waliif hidhuun, daara wal baasuun, dhangaalee adda addaa waliif hiixachuun dirqama miti.
“Kan qabaniin qaba dhaqu,…kan qabu kan kennes doqna hin jedhamu.” Akkuma jedhamu, fuula ifaa walitti agarsiisuu, waan qaban waliin cabsachuu, akka walii fi waliin jiraatan walitti himuu, afaanii baafatanii hammam akka wal jaalatan ifaa fi ifatti walii ibsuun warreen hangafa namni kamuu of harkaa qabudha. Namni hedduun eessa akka ooluu fi maalummaa isaa osoo hin beekiin, addunyaa ormaa keessa naanna'aa oola. Waa'ee maatii fi ollaa isaa osoo hin beekiin waa'ee biyyoota biroo, ardiilee badhaadhoo fi waan biraa haasahuun eenyuun caalaa beekama. Barataan hojii manaa isaa osoo hin hojjetiin, diraamaafi fiilmii saayintistii gahee isaa xumuree addunyaa kana irraa godaanee daawwachaa bula. Akkanaan barruuleen isaa qullaa ishee gara mana barumsaa deemtee galti. Maqaa hiriyyoota warreen isa fayyadan, yoo dhukkubsatee mana yaalaa isa geessan, yoo rakkate rakkoosaaf fala barbaadan osoo hin beekiin maqaa taphattoota biyya ormaa tarreessuun yeroofi bara isaatti ibidda qabsiisa. Araada balfamaa!
Namni kamuu haala jiru keessatti waan isarraa eegamu osoo godhee, ceephoon umurii gara boodaafi miidhamni du'aan boodaa ni hir'ata. Abbaan yeroo lubbuun jiru osoo ilmi waan isarraa barbaachisu raawwateefii, gaafa inni lafa dhugaa deemu miidhama bayyanachuun waggoota hedduu lakkoofsisu miidhamuu irraa qusatama. Hariiroon kamuu akkanuma. Eeggannaa akka jechuuti!
Comments